Sort by
Sort by

Извори на храна богата со протеини од растително потекло за време на постот

Извори на растителни протеини за време на постот
 

Периодот на постење носи промени во секојдневната исхрана, но на тоа може да гледате како на можност да испробате нови комбинации. Иако намирниците на растителна база често кријат повеќе хранливи состојки отколку што мислите, важно е за време на постот да ги внесете сите потребни материи – како протеините, преку храна богата со протеини.

Храна богата со протеини

Протеините се клучни елементи кои се од суштинско значење за доброто здравје. Тие помагаат во зајакнувањето на мускулите, сврзното ткиво, формирањето на колаген и други елементи во телото. Протеините се материјал кој нашите тела го користат за изградба и регенерирање, контролирање на хемиските процеси и генерално одржување на здравјето. За да внесат протеини, луѓето јадат растенија, животни, риби и школки, кои понатаму се разградуваат на аминокиселини со процесот на варење.

Протеините кои ги содржат сите девет есенцијални аминокиселини се нарекуваат "комплетни или целосни", а оние на кои им недостига една или повеќе есенцијални аминокиселини, ние ги нарекуваме "некомплетни или нецелосни" протеини. Целосните протеини обично вклучуваат протеини од млеко, месо, сирење, живина, риба и школки, јогурт и соја. Општо земено, растителните протеини, како што се оризот, житарките и белковините од орев се нецелосни протеини. Но, аминокиселините од некомплетните протеини можат да се комбинираат или дополнат со други нецелосни аминокиселини. На пример, може да се комбинира ориз кој е богат со некомплетен протеин заедно со грав или путер од кикирики со интегрален леб, за да се обезбеди соодветен внес на сите есенцијални аминокиселини.

Важно е да се комбинираат различни рецепти со соодветни количини на протеини. За поголемиот дел од возрасната популација, се препорачува внесот на протеини да биде помеѓу 10 и 35 проценти од вкупните дневни калории.

Протеини од растително потекло

Нашиот Веге водич ви помага во подготовката на балансирани оброци кои ќе ви ги обезбедат сите потребни макронутриенти (протеини, јагленихидрати, масти) како и соодветно количество на микронутриенти (витамини и минерали). Подолу можете да најдете список на 6 протеини од растително потекло, кои ќе ви обезбедат урамнотежена исхрана за време на постот.

Киноа

Киноата е дел од древната фамилија на житарици. Се нарекува така затоа што се одгледувала илјадници години и претрпела многу малку генетски промени. Покрај значителното количество растителни протеини, киноата содржи и многу други хранливи материи, на пример железо и магнезиум, но и поголемо количество влакна од многу други житарици.

Генерално, оризот можете да го замените со киноа во сите рецепти, но оваа прекрасна житарица е совршена за салати, супи и варива

Тофу

Тофу е растителна храна со широка примена, направена од соино млеко. Генерално, сојата е многу популарна кај вегетаријанците поради тоа што содржи многу протеини, железо, калциум и фосфор.

За да уживате во широката примена на тофу-сирењето, важно е да се напомене дека оваа храна ги попримува мирисите од сосовите или храната во која се готвела. Пробајте во тавчето да измешате малку соја сос со омилените зачини, масло од сусам и малку мед, а потоа додајте исечкан лук и друг зеленчук.

Исто така, тофу можете да додадете и во вашето утринско смути, како дополнителен извор на протеини за вашиот посен оброк!

Грав

Покрај високото количество на растителни протеини, гравот содржи и многу корисни супстанции за вашето тело, како железо, цинк, магнезиум и влакна. Генерално, се препорачува за подобро варење, а неговата текстура во многу јадења може да ги замени протеините од животинско потекло. На пример, можете да се одлучите за плескавици од грав, ако сакате нешто вкусно за време на постот.

За да подготвите плескавици од грав, измешајте кутија пасиран црвен грав со две изронети парчиња леб, малку црвен кромид, кој претходно сте го спремиле, неколку лажици брашно и омилените зачини, а потоа можете да ги испржите плескавиците во мала загреана тава.

Леблебија

Леблебијата содржи големо количество влакна и протеини и е незаменлива во медитеранската исхрана. Може да се консумира во салати и варива, но една од најпопуларните намирници, која се прави на база на леблебија е хумусот. Измешајте две конзерви леблебија со маслиново масло, намаз од сусам (познат и како тахини), две чешниња лук, сол, бибер, ким и лимонов сок. Можете да експериментирате во однос на количината за да добиете совршен хумус или можете да додадете и други вкусови, како на пример пиперки..

Бадеми

Бадемите се одличен извор на растителни протеини – само 100 g бадеми содржат 21,15 g протеини. Бадемите се богати и со витамин Е што значи дека се важен извор на антиоксиданси. Ова може да ви помогне во одржување на телесната тежина. Исто така, консумирањето бадеми може да биде корисно за кардиоваскуларното здравје и помага во спречување на појава на дијабетес.

Препорачливо е бадемите да се консумираат со лушпа за да ги искористите сите хранливи состојки. Обидете се да замените една од двете препорачани ужини во текот на денот со една рака бадеми. За време на постот, може да додадете сецкани бадеми во салата, јогурт од соја или соино млеко со житарици.

Путер од кикирики

Путерот од кикирики е храна полна со хранливи состојки, кои, ако се консумираат умерено, може да имаат долгорочни придобивки за вашето тело. Освен што е вкусен, путерот од кикирики содржи и протеини, магнезиум, калиум и витамини Е и Б6. Иако совршено се консумира наутро на парче ‘ржан леб, може да го додадете и во прелив за салата. Само измешајте по две лажици од следниве состојки: путер од кикирики, соја сос, мед и оцет. Потоа додајте лук, ѓумбир и малку вода за да ја постигнете посакуваната густина.

Со толку вкусни рецепти, нема ни да знаете дека е пост! Инспирирајте се со нашите рецепти.